اسلام آباد: پاکستان تحریک انصاف (پی ٹی آئی) کے ہیڈ آفس پر تجاوزات کے آپریشن کے بعد کیپٹل پولیس نے آپریشن کی مزاحمت کرنے والے پارٹی کے ارکان کی گرفتاری کے احکامات جاری کر دیئے۔

اسلام آباد پولیس نے تجاوزات کے خلاف آپریشن میں مزاحمت کرنے والے افراد کو گرفتار کرنے کا حکم جاری کر دیا جب کہ آپریشن کی جگہ پر پولیس کی اضافی نفری طلب کر لی گئی ہے۔

قبل ازیں کیپٹل ڈویلپمنٹ اتھارٹی (سی ڈی اے) کی انسداد تجاوزات ٹیم نے تحریک انصاف کے ہیڈ آفس پر تجاوزات کے خلاف آپریشن شروع کیا۔

تفصیلات کے مطابق انسداد تجاوزات ٹیم نے ضلعی انتظامیہ کے ہمراہ سیکٹر G8/4 میں واقع پی ٹی آئی کے ہیڈ آفس پہنچ کر سیل کر دیا۔

پی ٹی آئی کے مرکزی دفتر کے باہر پولیس اہلکاروں کے ساتھ بھاری مشینری بھی تعینات کر دی گئی ہے، اس دوران سی ڈی اے حکام کا کہنا ہے کہ سیاسی جماعتوں کے دفاتر کی غیر قانونی تعمیرات کو گرایا جا رہا ہے۔

جس پلاٹ پر پی ٹی آئی کا دفتر قائم ہے اس کی جانچ پڑتال جاری ہے، کیونکہ یہ سرتاج علی نامی شخص کو الاٹ کیا گیا ہے۔

تاہم ملحقہ اراضی پر قبضہ کرکے نمایاں تجاوزات کی گئی ہیں جن میں بلڈنگ بائی لاز کی خلاف ورزی کرتے ہوئے اضافی منزل کی تعمیر بھی شامل ہے۔